Latest topics
» ஸ்மால் & மிட் கேப் ஃபண்ட் முதலீடு... - கவனிக்க வேண்டிய 10 விஷயங்கள்!
by தருண் Fri Jul 21, 2017 10:09 am

» ஆவணங்களை லேமினேட் செய்வது சரியா?
by தருண் Fri Jul 21, 2017 10:04 am

» வருமான வரிச் சலுகைகள் & முதலீடுகள்! - நில்... கவனி... செய்!
by தருண் Fri Jul 21, 2017 10:00 am

» வருமான வரிக் கணக்குத் தாக்கல்... தவிர்க்க வேண்டிய 10 தவறுகள்!
by தருண் Thu Jul 20, 2017 9:47 am

» அரசு ஊழியர்களுக்கு வருமான வரிக் கணக்கீடு எப்படி?
by தருண் Thu Jul 20, 2017 9:44 am

» இயற்கைப் பேரழிவிலிருந்து காக்கும் காப்பீடுகள்!
by தருண் Thu Jul 20, 2017 9:40 am

» இஎல்எஸ்எஸ் ஃபண்ட் யாருக்கு ஏற்றது?
by தருண் Thu Jul 20, 2017 9:38 am

» பைசா பங்குகளில் முதலீடு செய்யலாமா?
by தருண் Thu Jul 20, 2017 9:37 am

» வருமான வரிக் கணக்கு தாக்கல் இனி ஈஸிதான்!
by தருண் Thu Jul 20, 2017 9:35 am

» சரியும் எஃப்.டி வட்டி... அதிக வருமானத்துக்கு என்ன வழி?
by தருண் Thu Jul 20, 2017 9:33 am


மார்க்கெட்டிங் மிக அவசியம்

View previous topic View next topic Go down

மார்க்கெட்டிங் மிக அவசியம்

Post by தருண் on Thu Jun 12, 2014 10:52 am

நாம் எந்த தொழில் ஆரம்பித்தாலும் அந்த தொழிலுக்கு, மார்க்கெட்டிங் என்பது மிகவும் அவசியமாகிறது. மார்க்கெட்டிங் என்றவுடன் நீங்கள் தொலைக்காட்சி விளம்பரத்தையும் பத்திரிக்கை விளம்பரத்தையும் மட்டுமே நினைத்து விடாதீர்கள். அதை தவிர பல மார்க்கெட்டிங் வித்தைகள் இருக்கிறது. அதை உங்கள் தொழிலுக்கு ஏற்றாற்போல் அமைத்துக்கொள்ளுங்கள்.

தமிழர்களில் பெரும்பாலானோர்கள் மார்க்கெட்டிங் செய்வதை அல்லது விற்பனை செய்வதை விரும்புவதில்லை. இதற்கு காரணம் அவர்களிடமுள்ள கூச்ச சுபாவம் ஆகும். பள்ளி பருவங்களில் நமது குழந்தைகள், பொருளாதாரத்தில் வளர்ந்தநாட்டு குழந்தைகளைப் போல, வெளியில் சென்று பகுதி நேரம் வேலை பார்ப்பதில்லை; அல்லது விற்பனை செய்வதில்லை.

இதுவே அவர்களுக்கு பிற்காலத்தில் கூச்ச சுபாவமாக மாறிவிடுகிறது. நாம் ஒருவரிடம் பேசுவதிலிருந்து, நாம் நினைப்பதை ஆணித்தரமாக எடுத்து கூறுவதிலிருந்து, ஒரு விற்பனையை செய்து முடிக்கும் வரை மார்க்கெட்டிங் என்ற துறை உலாவுகிறது. சிறுதொழில் ஆரம்பிப்பவர்கள் எவ்வாறு மிக மிக குறைந்த பணத்தில் அல்லது பணமே இல்லாமல் மார்க்கெட்டிங் செய்வது?

தரமான அனுபவம் வேண்டும்

செலவே இல்லாத மார்க்கெட்டிங் யுத்தி என்பது வாய்மூலமாக (Word of Mouth) பரவுவதுதான். உதாரணத்திற்கு நீங்கள் ஒரு டிபார்ட்மெண்ட்டல் ஸ்டோர் தொடங்கியுள்ளீர்கள் என்று வைத்துக்கொள்வோம். உங்கள் கடையை ரோட்டில் பார்த்ததும் சிலர் கடையில் நுழைந்து வாங்க வருவார்கள். ஆனால், நீங்கள் அவர்களிடம் பேசும் விதம், பழகும் விதம், மற்றும் சேவை செய்யும் விதம் இவற்றைப் பொறுத்துத்தான் அவர்கள் உங்கள் கடைக்கு மறுமுறை வருவார்கள். (விலை போன்றவையெல்லாம் உங்கள் போட்டியாளர்களுடன் ஒப்பிடுகையில் சமமாக இருக்கும் என்று எடுத்துக்கொள்ளும் பட்சத்தில்!)

இதுபோல் அவருக்கு உங்கள் கடையில் ஏற்படும் அனுபவம் இனிமையாக இருக்கும் பொழுது, அவர் உங்கள் கடையைப் பற்றி, அவருக்கு நெருக்கமானவர்களிடம் பரிந்துரை செய்வார்.

இவ்வாறு உங்களுக்கு வரும் வாடிக்கையாளர்கள்தான் தலைமுறை தலைமுறையாக உங்களுடன் உறவு கொண்டு இருப்பார்கள். இதற்காக நீங்கள் செய்ய வேண்டிய மார்க்கெட்டிங் செலவு எதுவும் கிடையாது. நீங்கள் செய்ய வேண்டியது எல்லாம் உங்கள் கடையில் அவருக்கு ஏற்படும் அனுபவம் இனிமையாக இருக்குமாறு பார்த்துக்கொள்ள வேண்டியதுதான்!

உங்களிடம் பெரும் பணம் இல்லாத பொழுது உங்கள் சேவையை அதிகரிப்பது ஒன்றுதான் உங்களின் மார்க்கெட்டிங் யுத்தியாக இருக்க வேண்டும். இதற்கு அடுத்த கட்டமாக மிகக் குறைந்த செலவில் உங்களுக்கு தொழிலை தேடித்தருவது உங்களது விசிட்டிங் கார்டு (Visiting Card) ஆகும். தொழில் ஆரம்பித்த புதிதில் நீங்கள் சந்திப்பவர்களிடம் எல்லாம் உங்களின் விசிட்டிங் கார்டை கொடுக்கும் பொழுது உங்களது தொழிலுக்கு ஒரு அடையாளம் கிட்டும். மேலும் அவ்வாறு கொடுக்கும் பொழுது உங்கள் பொருளில் அல்லது உங்களின் சேவையில் விருப்பம் இருப்பவர்கள் உங்களை நேரடியாக தொடர்பு கொள்வார்கள்.

குறைவான செலவில் வரக்கூடிய மற்றுமொரு கருவி தபால் ஆகும். உங்களது தொழிலைப் பற்றி சுருக்கமாக அச்சிட்டு அஞ்சல் செய்யும்பொழுது அது உரியவர்க்கு சென்று கிட்டும். அல்லது உங்களது பகுதியில் உள்ள அனைத்து தபால் பெட்டிகளிலும் நீங்கள் போடலாம்.

அதுபோல் நீங்கள் உங்கள் லிஸ்ட்டில் இருக்கும் 200 அல்லது 300 பேருக்கு அனுப்பும்பொழுது அதிலிருந்து சுமாராக 5% பேர் வாடிக்கையாளர்களாக மாற வாய்ப்பு இருக்கும்.

சமூக வலைதளங்களை பயன்படுத்துதல்

இவை எல்லாவற்றையும் விட எந்த தலைமுறையினருக்கும் கிட்டாத ஒரு பொக்கிஷம் நமக்கெல்லாம் கிடைத்துள்ளது. அதுதான் இன்றைய இன்டர்நெட், இ-மெயில் மற்றும் ஆடியோ மற்றும் வீடியோ சாட் (Audio, Video Chat) ஆகும். இ-மெயில் அனுப்புவதற்கு உங்களுக்கு செலவு ஏதும் கிடையாது. ஒவ்வொரு தொழிலுக்கும் வலைதளம் என்பது இன்று இன்றியமையாதது ஆகிவிட்டது. உங்களது வலைதளத்தை ஒரு குறிப்பிட்ட செலவில் ஆரம்பித்துக் கொள்ளலாம் - அதுபோல் facebook, twitter, linkedIn போன்ற இணையதளங்களில் உங்களது கணக்கைத் துவக்கினால் உங்களது பிஸினஸ் வாய்ப்புகள் அதிகரிக்கும்.

மேலும் உங்களின் சேவையினால் திருப்தி அடைந்த வாடிக்கையாளர்களை அணுகி உங்களைப்பற்றிய பரிந்து ரையைக் கேட்கலாம். அப்பரிந்துரையை உங்களது இணையதளத்தில் போட்டு வைக்கலாம்.

அவ்வாறு உங்களைப்பற்றிய பரிந்துரையை தர தயாராக இருக்கும் ஒரு சில நபர்களிடம் அனுமதி பெற்று, புதிதாக வரும் வாடிக்கையாளர்கள் யாரேனும் உங்களைப் பற்றி அல்லது உங்கள் நிறுவனத்தைப் பற்றி தெரிந்து கொள்ள ரெஃபரன்ஸ் (reference) கேட்டால் அவர்களது பெயரையும் தொலைபேசி எண்ணையும் கொடுக்கலாம்.

ஏனென்றால் புதிதாக வரும் வாடிக்கையாளருக்கு உங்களது சேவை மற்றும் தொழில் செய்கைகள் குறித்து பலவிதமான கேள்விகள் மற்றும் சந்தேகங்கள் இருக்கும். அவற்றையெல்லாம் நீங்கள் கொடுக்கும் ரெஃபரன்ஸ் மூலம் அவர்கள் கேட்டுத் தெரிந்து கொள்ளவார்கள்.

இன்னும் பல சின்ன சின்ன யுத்திகளையும் நீங்கள் கையாளலாம். உதாரணத்திற்கு நீங்கள் அனுப்பும் ஒவ்வொரு மின்னஞ்சலிலும் உங்களது தொழிலின் முகவரி, தொலைபேசி எண்கள், இணையதளத்தின் விலாசம் நீங்கள் விற்கும் பொருட்கள் போன்றவற்றையெல்லாம் நிரந்தரமாக இணைத்து விடலாம். அதுபோல் நீங்கள் அனுப்பும் எஸ்.எம்.எஸ்ஸிலும் (SMS) உங்களின் பெயர், தொழிலின் பெயர், இணையதளம் போன்றவற்றை குறிப்பிட்டு அனுப்பலாம்.

புரபொஃஷனல்ஸ் (Professionals) என்று கூறக்கூடிய மருத்துவர்கள், சட்ட நிபுணர்கள், ஆலோசகர்கள், சார்டர்ட் அக்கவுண்டண்ட் (Chartered Accountants) போன்ற இன்னும் பல அறிவுசார் துறைகளில் இருப்பவர்கள் பொது மக்களுக்குள்ள சந்தேகங்களை தொலைக்காட்சி, பத்திரிக்கை, இணையதளங்கள் மூலமாக தீர்த்து வைப்பதன் மூலமாகவும் அவர்களுக்கு புதிய வாடிக்கையாளர்கள் கிடைக்க வாய்ப்புள்ளது.

மனிதன் என்பவன் ஒரு சமூக விலங்கு. நாம் எப்பொழுதும் பலருடன் நட்பு மற்றும் தொடர்பு வைத்துக் கொள்வது அவசியம். அது நமது தொழிலுக்கும் உதவியாக இருக்கும். ஆகவே உங்கள் பகுதியில் உள்ள லயன்ஸ் கிளப், ரோட்டரி கிளப்-களில் நீங்கள் சேர்ந்து கொள்ளலாம். அதேபோல் உங்கள் பகுதியில் உள்ள சமூக அமைப்புகளில் உங்களை நீங்களே ஈடுபடுத்திக் கொள்ளலாம். அவ்வாறு செய்யும்பொழுது, நீங்கள் பலரையும் சந்திக்க வாய்ப்புள்ளது. அவற்றின் மூலம் மறைமுகமாக உங்கள் தொழிலும் அபிவிருத்தி அடையும். இவையெல்லாம் சின்ன சின்ன செய்கைகள்தான்.

ஆனால் நடைமுறைக்கு கொண்டு வருவதற்கு உங்களுக்கு சில ஆண்டுகள் ஆகிவிடும். நாம் மேற்கூறிய முறைகளில் உங்கள் மார்க்கெட்டிங்கை செய்யும் பொழுது, ஒரு ஸ்டார்ட்-அப்-பிற்கு குறைந்த செலவில் நிறைய விளம்பரம் கிடைக்கும் தொழிலும் பெருகும்!

-தி இந்து

தருண்

Posts : 1292
Join date : 08/10/2013

View user profile

Back to top Go down

Re: மார்க்கெட்டிங் மிக அவசியம்

Post by தருண் on Thu Jun 19, 2014 10:49 am

மார்க்கெட்டிங் மிக அவசியம் - 2

தொழில் ஆரம்பித்த காலத்தில், அதுவும் முதல் தலைமுறை தொழிலதிபராக இருக்கும் பட்சத்தில் முடிந்த அளவிற்கு செலவுகளைக் குறையுங்கள்.

பல சிறு தொழில் செய்யும் நிறுவனங்கள் குறுகிய காலத்திலேயே காணாமல் போவதற்கு முக்கியக் காரணம் மார்க்கெட்டிங்கில் பணத்தை அளவிற்கு அதிகமாக இறைத்து விடுவதுதான்! உங்கள் தொழில் ஓரளவு வளர்ச்சி பெற்றபின் நீங்கள் பத்திரிகை அல்லது தொலைக்காட்சி அல்லது விளம்பரப் பலகைகள் போன்றவற்றின் மூலம் உங்கள் தொழிலை விளம்பரப்படுத்தலாம். ஆகவே உங்கள் தொழில் நன்றாக லாபம் ஈட்டும்வரை பெரிய அளவு விளம்பரங்களில் குதித்து விட வேண்டாம்.

நீங்கள் உங்கள் வாடிக்கையாளருடன் அணுகும் விதம், பழகும் விதம், மேலும் அவர்களின் சந்தேகங்கள் மற்றும் கேள்விகளுக்கு நீங்கள் பதிலளிக்கும் விதம் போன்றவற்றை வைத்தே உங்களிடம் அதிகமான வாடிக்கையாளர்கள் திரும்ப திரும்ப வருவார்கள். மேலும் அவர்களது நண்பர்களையும் உறவினர்களையும் உங்களிடம் வருவதற்கு பரிந்துரை செய்வார்கள்.

எத்தொழிலிக்கும் மார்க்கெட்டிங் என்பது மிகவும் அவசியமான ஒன்று. கடையை அல்லது அலுவலகத்தை திறந்து விட்டு வெறுமனே உட்கார்ந்திருந்தால், ஒரு வாடிக்கையாளர் கூட உங்களைத் தேடி வரமாட்டார். வாய் மூலமாகவோ, மின் அஞ்சல் மூலமாகவோ, தொலைபேசி மூலமாகவோ அல்லது நோட்டீஸ் மூலமாகவோ நீங்கள் என்ன செய்கிறீர்கள் என்பதை பிறருக்குத் தெரியப்படுத்த வேண்டும். அது மிக மிக அவசியம்.

மார்க்கெட்டிங் என்பது ஒரு தொழிலுக்கு உயிர் மூச்சைப் போன்றது என்பதை நினைவில் கொள்க! எவ்வளவு பெரிய நிறுவனங்களாக இருந்தாலும் அவற்றிற்கும் மார்க்கெட்டிங் மிகவும் அவசியமாகிறது. எவ்வளவுதான் மார்க்கெட்டிங் செய்தாலும் நாம் விற்கும் பொருள் தரமாக இல்லாவிட்டால் அதற்காக செலவிடும் பணம் விரயம்தான். ஆகவே மார்க்கெட்டிங் செய்வதற்கு முன் உங்களது பொருட்களின்/ சேவையின் தரத்தை உயர்த்திக் கொள்ளுங்கள்.

உங்களுக்கென்று ஒவ்வொரு செயலுக்கும் அல்லது சேவைக்கும் ஒரு வரையறையை ஏற்படுத்திக் கொள்ளுங்கள். உங்களுக்கு ஒரு விற்பனை குறித்து கேள்வி வந்தால், அக்கேள்விக்கு 24 மணி நேரத்திற்குள் பதில் செய்து விடுவேன் என்று முடிவெடுத்துக்கொள்ளுங்கள்.

அதேபோல் ஒரு ஆர்டர் வந்தால் எவ்வளவு நாட்களுக்குள் உங்களால் பூர்த்தி செய்ய முடியும் என்று வாடிக்கையாளருக்கு முன் கூட்டியே சொல்லி விடுங்கள். நமது ஒவ்வொரு சொல்லும் சத்தியமாக இருக்க வேண்டும். தொழிலில் அந்த சத்தியம் சிதையாமல் பார்த்துக் கொள்ளுங்கள்.

மார்க்கெட்டிங் செய்வதற்கு முன்னால் எந்த மீடியம் உங்களுக்கு சரியாக இருக்கும் என்று தெரிந்து கொள்ளுங்கள். அந்த மீடியத்தில் எந்த நிறுவனம் மூலமாக விளம்பரம் கொடுத்தால் உங்களுக்கு அதிக ரெஸ்பான்ஸ் கிடைக்கும் என்பதையும் தெரிந்து கொள்ளுங்கள். அவ்வாறு விளம்பரம் கொடுக்கும் பொழுது, எதன் மூலமாக குறைந்த பணத்தில் நிறைந்த விளம்பரம் கிடைக்கும் என்பதை அறிந்து கொள்ளுங்கள். இவ்வாறு நீங்கள் யோசித்து முடிவெடுக்கும்பொழுது செலவும் குறைவாக இருக்கும். அதே சமயத்தில் விளம்பரமும் பயனுள்ளதாக இருக்கும்.

நீங்கள் புதிதாக ஆரம்பிக்கும் தொழில் அனைத்துமே சில்லறை வாடிக்கையாளர்களை ஒட்டியே இருக்க வேண்டும் என்பது அவசியம் இல்லை. பல சமயங்களில் நீங்கள் புதிதாக ஆரம்பிக்கும் தொழில்களுக்கு வாடிக்கையாளர்கள் நிறுவனங்களாக அல்லது அரசு அலுவலகங்களாக இருக்கலாம். அதுபோன்ற சமயத்தில் நீங்கள் பொட்டன்ஷியல் வாடிக்கையாளர்களை நேரில் சென்றுதான் பார்க்க வேண்டும்.

அவ்வாறு நீங்கள் நேரில் சென்று பார்த்து உங்கள் பொருட்கள் அல்லது சேவைகளைப் பற்றியும், பிற நிறுவனங்களை விட நீங்கள் எவ்வளவு சிறப்பாக செய்கிறீர்கள் என்றும் எடுத்துக்கூற வேண்டும். நீங்கள் ஒரு நிறுவனத்தைப் பார்த்தவுடன் உங்களுக்கு ஆர்டர் கிடைக்கும் என்று கனவு காணாதீர்கள். அந்நிறுவனங்களுடன் நீங்கள் தொடர்ச்சியாக உறவில் இருக்கும் பொழுதுதான் அவர்களிடமிருந்து உங்களுக்கு ஆர்டர் கிடைக்கும்.

ஆகவே எந்த நிறுவன வாடிக்கையாளரையும் ஒருமுறை பார்த்தவுடன், ஆர்டர் கிடைக்கவில்லையே என்று எண்ணி விட்டுவிடாதீர்கள். தொடர்ச்சியாக பலமுறை பார்க்கும்பொழுதுதான், உங்களுக்கு வெற்றி கிடைக்கும்.

உங்களிடம் திருப்தி அடைந்த வாடிக்கையாளரிடம், அவர்களைப் போல உங்களின் சேவை/ பொருள் தேவைப்படும் நிறுவனங்களின் பெயர்களையும் அங்கு முக்கிய பொறுப்பில் இருப்பவர்களின் பெயர்களையும் கேட்டு வாங்கி பொட்டன்ஷியல் வாடிக்கையாளர்களை சென்று பாருங்கள். இவ்வாறு தான் ஒரு சங்கிலிபோல சில வருடங்களில் உங்கள் தொழில் பெரிதாக உச்சிக்குச் செல்லும். சிறுதுளிதான் பெரு வெள்ளமாகிறது.

ஆகவே மார்க்கெட்டிங் என்ற உயிர் மூச்சை உங்கள் வசதிக்கு மற்றும் தோதிற்கு ஏற்ப செய்து கொள்ளுங்கள்! உங்கள் தொழிலில் நீங்கள் வெற்றி அடைவது உறுதி!

தி இந்து

தருண்

Posts : 1292
Join date : 08/10/2013

View user profile

Back to top Go down

Re: மார்க்கெட்டிங் மிக அவசியம்

Post by தருண் on Fri Jun 27, 2014 1:16 pm

பண வரவு, செலவை நிர்வகிப்பது எப்படி?

கடந்த இரண்டு வாரங்களில் மார்க்கெட்டிங் குறித்து பார்த்தோம். இவ்வாரம் கேஷ் ஃபுளோ –வை (cash flow) நிர்வகிப்பது குறித்துப் பார்ப்போம். பல தொழில்கள் வெற்றி அடையாமல் போவதற்கு முக்கியக் காரணம் கேஷ் ஃபுளோ-வை (பண வரத்தை) சரியாக நிர்வகிக்காததுதான்.

கேஷ் ஃபுளோ என்று நாம் எதைக் கூறுகிறோம்? நீங்கள் விற்பனை செய்வதன் மூலம் உங்கள் நிறுவனத்திற்கு பணம் வருகிறது. அந்த விற்பனைக்காக பல செலவுகள் உங்களுக்கு இருக்கும். பொதுவாக தொழில்களில் விற்பனை அதிகமாகவும், செலவு அதைவிடக் குறைவாகவும் இருக்கும். இந்த இரண்டிற்கும் உள்ள வித்தியாசம்தான் நமது லாபம்.

புதிதாக ஆரம்பிக்கும் தொழில்களில் இது சற்று உல்டாவாக இருக்கவும் வாய்ப்புள்ளது. உங்களது செலவு அதிகமாகவும் விற்பனை குறைவாகவும் இருக்கும். அது போன்ற சமயங்களில் உங்களின் தொழில், சில காலங்களுக்கு நஷ்டத்தில் நடந்து கொண்டிருக்கும். அச்சமயத்தில் தொழிலை சப்போர்ட் செய்வதற்கு நீங்கள் வெளியிலிருந்து பணம் கொண்டுவர வேண்டியதாக இருக்கும். தொழில் ஓரளவு ஸ்டார்ட் அப் நிலையில் இருந்து நிரந்தரமானவுடன், உங்களது பணத்தின் வரவு மற்றும் செலவு ஆகிய இரண்டும் கச்சிதமாக இருக்க வேண்டும்; அல்லது கையில் பணம் மிதக்க வேண்டும்.

அவ்வாறு கேஷ் ஃபுளோ சரியாக இல்லாவிட்டால், நீங்கள் கடனாளியாகி சீக்கிரமே தொழிலை மூடும் நிலைமைக்கு வந்து விடுவீர்கள். கேஷ் ஃபுளோ தொடர்ந்து மிகவும் டைட்டாக இருந்தால், நீங்கள் எங்கோ ஏதோ தப்பு செய்கிறீர்கள் என்று அர்த்தம். அந்தத் தப்பை உடனடியாக ஆராய்ந்து, அதற்கான தீர்வைக் கண்டுபிடியுங்கள்.

சரி அவ்வப்பொழுது ஏற்படும் இந்த கேஷ் ஃபுளோ பிரச்சினையை எவ்வாறு சமாளிக்கலாம்? சிறு தொழில் செய்யும் பலர் தாங்கள் வாங்கும் பொருட்களை ரொக்கம் கொடுத்தும், விற்கும் பொருட்களை கடன் கொடுத்தும் தொழில் செய்கிறார்கள். இதேபோல் தொடர்ந்து சென்று கொண்டிருந்தால் அவர்களுக்கு கேஷ் ஃபுளோ பிரச்சினை அதிகமாகிவிடும்.

அவர்கள் வாங்குமிடத்தில் கடனுக்கு வாங்க வேண்டும்; இல்லையென்றால் விற்பதை ரொக்கத்திற்கு விற்க வேண்டும். அல்லது வாங்குவது விற்பது இரண்டுமே ரொக்கத்திற்கு அல்லது கடனுக்கு இருக்க வேண்டும். அவ்வாறு செய்யாத பொழுது, பிரச்சினைதான் தொடரும். ரொக்கம் கொடுத்து வாங்குபவர்களை ஊக்குவிப்பதற்காக ஓரிரு சதவிகிதம் டிஸ்கவுண்ட் கூட கொடுக்கலாம்.

அதேபோல் நீங்கள் வாங்குபவரிடம் உடனுக்குடன் கேஷ் கொடுத்தால், உங்களுக்கும் டிஸ்கவுண்ட் கிடைக்க வாய்ப்புள்ளது. இதனால் உங்களின் லாப மார்ஜினும் அதிகமாகும்.

சிலர் தொழில் ஆரம்பித்த புதிதில் விளம்பரங்களுக்காக அதிகமாக செலவு செய்வார்கள். இன்னும் சிலர் தொழில் ஆரம்பிக்கும் பொழுதே அலுவலகம் போன்றவற்றிற்காக தடாலடியாக செலவு செய்வார்கள். இதுபோன்ற சூழ்நிலைகளிலும் பணச்சிக்கலில் மாட்டிக்கொள்வார்கள். ஆகவே தொழில் ஆரம்பித்த புதிதில் செலவுகளை எவ்வளவு குறைவாகச் செய்ய முடியுமோ, அவ்வளவு குறைவாக செய்துகொள்ளுங்கள்.

நீங்கள் சேமிக்கும் ஒவ்வொரு ரூபாயும், நீங்கள் செய்யும் தொழிலின் வளர்ச்சிக்கு உதவும் என்பதை நினைவில் கொள்க!

பலருக்கு தொழில் லாபத்தில் நடந்தாலும், அவர்கள் கையில் போதுமான அளவு பணம் இருப்பதில்லை. உதாரணத்திற்கு அவர்கள் செலவுகளெல்லாம் மாதக் கடைசியில் இருக்கும்; அதே சமயம் அவர்கள் வரவுகள் மாத ஆரம்பத்தில் இருக்கும். அதுபோன்ற சமயத்தில் அவர்களுக்கு பணப்பற்றாக்குறை ஏற்படும். இதை எப்படிச் சமாளிக்கலாம்? உங்களுக்கு வரவு அதிகமாக இருக்கும் பொழுது, அதை எடுத்து மியூச்சுவல் ஃபண்டுகளில் உள்ள லிக்விட் ஃபண்டுகளில் போட்டுக் கொள்ளுங்கள்.

பிறகு தேவைப்படும்பொழுது சிறிது சிறிதாக நீங்கள் எடுத்துக்கொள்ளலாம். இதை ஒவ்வொரு மாத ஆரம்பத்திலும் நீங்கள் செய்து கொள்ளலாம். அதாவது மாத ஆரம்பத்தில் பணம் வந்தவுடன் லிக்விட் ஃபண்டுகளில் முதலீடு செய்துவிடுங்கள். மாதக் கடைசியில் தேவைப்படும் பொழுது எடுத்துக் கொள்ளுங்கள்.

அல்லது உங்களிடம் பணம் அபரிமிதமாக இருக்கும் பொழுது, அப்பணத்தை வங்கியில் ஒரு ஃபிக்ஸட் டெபாசிட்டில் போட்டுக்கொள்ளுங்கள். அந்த டெபாசிட்டிற்கு எதிராக ஓவர் டிராஃப்ட் [over draft - (OD)] கணக்கைத் துவக்கிக்கொள்ளுங்கள். நீங்கள் போட்ட டெபாசிட்டில் 90% வரை நீங்கள் கடனாக பெற்றுக்கொள்ளலாம். நீங்கள் எடுக்கும் கடன் தொகைக்கு, எடுக்கும் நாட்களுக்கு, உங்கள் டெபாசிட்டைவிட 1 - 2% அதிகமாக வட்டி கட்ட வேண்டி இருக்கும். திருப்பி உங்களுக்கு பணம் வந்தவுடன் அப்பணத்தை ஓ.டி கணக்கில் கட்டி விடுங்கள்.

இவ்வாறாக உங்கள் பண பற்றாக்குறையை நீங்கள் குறைவான செலவில் நிர்வகித்துக்கொள்ளலாம். இதற்காக நீங்கள் திட்டமிட்டு செய்தால்தான் முடியும். இன்றைய தினத்தில் இவ்வாறு சரியாக திட்டமிடாமல் பல சிறிய தொழிலதிபர்கள் அதிக வட்டிக்கு பிரைவேட் நபர்களிடம் கடன் வாங்கி அவதிப்படுகிறார்கள். அந்நிலை ஏற்படாமல் பார்த்துக்கொள்ளும் பொழுதுதான், உங்களுக்கும், உங்கள் வாடிக்கையாளர்களுக்கும், உங்கள் தொழிலுக்கும், உங்கள் குடும்பத்திற்கும் நிம்மதி கிடைக்கும்!

கேஷ் ஃபுளோ என்பது, தொழிலுக்கு, நமது உயிர் மூச்சைப் போன்றது. மூச்சு நின்றுவிடாமல் பார்த்துக் கொள்வது நமது கடமையல்லவா?

தி இந்து

தருண்

Posts : 1292
Join date : 08/10/2013

View user profile

Back to top Go down

மனித வளத்தை மேம்படுத்துவது எப்படி?

Post by தருண் on Thu Jul 03, 2014 3:04 pm

இந்த வாரம் சிறிய நிறுவனங்களுக்கான மனித வள மேம்பாட்டைக் குறித்துக் காண்போம். மனித வளம், பொருள் மற்றும் பணம் சேர்ந்துதான் ஒரு தொழில் உருவாகிறது. ஒரு தொழிலை உயர்த்துவதிலும் அல்லது நலிவடையச் செய்வதிலும் மனித வளத்தின் பங்கு மிக அதிகம். நல்ல மனிதர்களே நல்ல நிறுவனங்களை உருவாக்குகிறார்கள். பெரிய நிறுவனங்களுக்கு மனித வளத்தை கண்காணிப்பதற்கும் மேன்மைப் படுத்துவதற்கும் பெரிய அளவில் இலாகாக்கள் உள்ளன.

இன்று மனித வளத்துறை அதிகாரிகள் தத்தம் நிறுவனத்தில் மிக முக்கிய பொறுப்புகளை வகிக்கிறார்கள். காரணம் ஏனென்று உங்களுக்கே புரியும். இன்றைய அறிவுசார் தொழில் உலகத்தில் மனித வளத்தின் முக்கியத்துவம் நாளுக்கு நாள் அதிகரித்துக் கொண்டுதான் செல்கிறது.

பெரிய நிறுவனங்களுக்குப் போதுமான அளவு பணவசதியும் ஆள் பலமும் இருப்பதால் அவர்களால் நூற்றுக்கணக்காண/ ஆயிரக்கணக்காண/ லட்சக்கணக்காண தொழிலாளர்களை சுலபமாக நிர்வகிக்க முடிகிறது. ஆனால் நீங்கள் ஒரு சிறிய நிறுவனத்தை துவங்கும் பொழுது உங்களுக்கு ஒவ்வொரு செயலும் கடினமாகத் தோன்றும்.

உதாரணத்திற்கு நீங்கள் ஒரு ஆளை வேலைக்கு எடுப்பீர்கள். அவர் வேலைக்குச் சேர்ந்த மூன்று மாதத்திலேயே நான் விலகிக் கொள்கிறேன் என்று கூறுவார். அல்லது நீங்கள் ஒரு முக்கிய பொறுப்பில் வேலைக்கு ஒரு நபரை அமர்த்தியிருப்பீர்கள். அவருக்கு நன்றாக முக்கியத்துவம் கொடுத்திருப்பீர்கள்.

அவர் இல்லாமல் தொழில் நடத்த முடியாத அளவிற்கு அவரின் முக்கியத்துவம் உங்கள் நிறுவனத்தில் உயர்ந்திருக்கும். அவர் திடீரென்று ஊதிய உயர்வு எக்கச்சக்கமாக வேண்டுமென்று கூறுவார். சில சமயங்களில் உங்களை பிளாக்மெயில் செய்வது போன்று கூட இருக்கும். இன்னும் சில சமயங்களில் உங்களுக்கு வேலைக்கு ஆள் தேவைப்படும். நீங்களும் நல்ல ஊதியம் கொடுக்க தயாராக இருப்பீரகள்.

ஆனால் உங்கள் நிறுவனத்தில் வேலைக்குச் சேர யாரும் முன்வர மாட்டார்கள். காரணம் நீங்கள் ஒரு சிறிய நிறுவனம் என்பதுதான். இவற்றையெல்லாம் நினைத்தால் ஏன் நான் தொழில் ஆரம்பித்தேன்; நேரடியாக வேலைக்கு சென்றிருக்கலாமே என்றுகூட உங்களுக்கு விரக்தி ஏற்படும்.

இந்த பிரச்சினையெல்லாம் உங்களுக்கு மட்டுமல்ல; பல லட்சம் சம்பளம் வாங்கக்கூடிய மனித வள மேம்பாட்டுத்துறை அதிகாரியிலிருந்து, பல கோடி முதலீடு செய்து தொழில் நடத்தக்கூடிய தொழிலதிபர்கள் வரை அனைவருக்கும் உள்ளது.

அதுவும் இந்தியா போன்ற வளரும் பொருளாதாரத்தில் இது போன்ற பிரச்சினைக்குக் குறைவே இருக்காது. இவற்றையெல்லாம் சவாலாக எடுத்துக் கொள்ள வேண்டுமே ஒழிய, பிரச்சினையாக எடுத்துக் கொள்ளக் கூடாது.

சரி இவற்றை சமாளிப்பது எப்படி?

நீங்கள் முதன் முதலாக தொழில் துவங்கும் பொழுது உங்களுக்கு தெரிந்தவர்கள் மூலம் வேலைக்கு ஆட்களை சேர்க்கப் பாருங்கள். பெரும்பாலும் பயிற்சி செய்யப்பட்ட அல்லது அனுபவமிக்க ஆட்கள் உங்களுக்கு கிடைக்கமாட்டார்கள். ஆகவே கல்லூரிகளிலிருந்து புதிதாக வெளிவரும் மாணவ, மாணவிகளைத் தேர்ந்தெடுத்து நீங்கள்தான் பயிற்சி கொடுக்க வேண்டும்.

இவர்கள் நேரடியாக கல்லூரியிலிருந்து வருவதால் உங்கள் தொழில் தேவைகளுக்கேற்ப அவர்களை நீங்கள் வளைக்கலாம். மேலும் அவர்களுக்கு வேலை என்பது ஒரு புதிய அனுபவம் என்பதால் விருப்பமாக வேலை செய்வார்கள்.

சிறிய நிறுவனங்களில் வேலை செய்யும்பொழுது அவர்களுக்கு பலதரப்பட்ட அனுபவங்களும் கிடைக்கும். மேலும் முக்கியத்துவமும் கிடைக்கும். இவற்றோடு மட்டுமல்லாமல் அவர்களுக்கு வேலையில் ஒரு திருப்தியும் கிடைக்கும். இதுவே அவர்கள் பெரிய நிறுவனத்தில் சேர்ந்தால் அவர்களுக்கு கற்றுக்கொள்ள கிடைக்கும் வாய்ப்பு குறைவுதான். பத்தோடு ஒன்று பதினொன்றாக அவர்கள் அங்கே வேலை செய்வார்கள். மேலும் முக்கியத்துவம் என்பது அவர்களுக்கு கிடைக்கவே கிடைக்காது.

நீங்கள் கொடுப்பதைவிட பெரிய நிறுவனத்தில் சம்பளம் சற்று அதிகமாக கொடுக்கலாம். அது ஒன்றுதான் அவர்களுக்கு கிடைக்கும் லாபம். வேலைக்குச் சேருபவர்களிடம் இந்த லாப நஷ்டங்களை எடுத்துக் கூறும் பொழுது அவர்களும் உங்கள் நிறுவனத்தில் வேலைக்குச் சேர விருப்பமாக இருப்பார்கள்.

நீங்கள் தொழில் திட்டம் வகுக்கும் பொழுதே ஊழியர்களுக்கு கொடுக்கும் சம்பளத்தை சந்தை விலையை ஒட்டி எடுத்துக்கொள்ளுங்கள். ஏனென்றால், சந்தையை விட நீங்கள் ஊதியம் குறைவாகக் கொடுக்கும் பொழுது அவர்கள் உங்களிடம் அதிக நாள் தங்கமாட்டார்கள். ஊழியர்கள் வருவதும் செல்வதும் உங்களுக்கு பெரும் பிரச்சினையாக மாறிவிடும்.

ஆரம்ப காலத்தில் நீங்கள் தொழில் துவங்கும் பொழுது இவையெல்லாம் பிரச்சினையாகத் தெரியும். ஆனால் வருடங்கள் ஆக ஆக, நெளிவு சுழிவுகளை நீங்களே புரிந்து கொள்வீர்கள்.

தி இந்து

தருண்

Posts : 1292
Join date : 08/10/2013

View user profile

Back to top Go down

பணியாளர்களின் தேவையை புரிந்துகொள்ளுங்கள்

Post by தருண் on Sat Jul 12, 2014 11:04 am

மனித வள மேம்பாட்டின் தொடர்ச்சியை இவ்வாரமும் காண்போம். சிறிய நிறுவனத்தில் வேலை செய்யும் ஊழியர்களுக்கு தொழில் பற்றிய அறிவு (exposure) மிக நன்றாக கிடைக்கும். சிறிய நிறுவனம் என்பதால் இலாகாக்கள் என்று அங்கு தனித்தனியாக இருக்காது. ஆகவே தொழில் பற்றிய நுணுக்கங்களை நன்றாகக் கற்றுக்கொள்ளலாம்.

சில காலம் முன்பு ஒரு நண்பரைச் சந்தித்தேன். அவர் 1960 – களில் இன்ஜினீயரிங் முடித்தார். அவருடன் படித்த சக நண்பர்களுக்கு மின்சார வாரியம், பொதுப்பணித்துறை போன்றவற்றில் வேலை கிடைத்தது. இவருக்கோ அது போன்ற நல்ல வேலை கிடைக்கவில்லை. அவர் சென்னை புறநகர் பகுதியிலுள்ள ஒரு சின்ன இன்ஜினீயரிங் யூனிட்டில் வேலைக்குச் சேர்ந்தார். சில காலங்கள் வேலை செய்துவிட்டு சம்பளம் போதவில்லை என்பதால் அவரே அதுபோன்ற ஒரு சிறிய யூனிட்டை தொடங்கினார்.

காலம் வேகமாக ஓடியது. அவர் நண்பர்கள் சில காலம் முன்பு ஓய்வு பெற்றார்கள். அவர்களுடன் ஒப்பிடும்பொழுது நண்பருடைய நிதி நிலைமை மற்றும் வாழ்க்கைத்தரம் மிகவும் உயர்வாக இருந்தது. வேலையில் கிடைக்கும் திருப்தி, சொத்துக்கள், வசதிகள் என அனைத்துமே அவருக்கு திருப்திகரமாக இருந்தது. ஆகவே தொழில் செய்ய விருப்பமுள்ளவர்கள், தொழிலில் ஆர்வத்துடன் வேலை செய்ய நினைப்பவர்கள், பொறுப்புகளை ஏற்றுக்கொள்ள விருப்பப்படுபவர்கள் போன்ற அனைவருக்கும் சிறுதொழில் நிறுவனங்களில் வேலை செய்வது ஒரு வரப்பிரசாதம் ஆகும். சொந்தமாக தொழில் துவங்க நினைப்பவர்கள் சிறிய நிறுவனங்களில் பணிபுரிவதே சிறந்தது.

சிறுதொழில் செய்பவர்கள் அடிக்கடி சந்திக்கும் பிரச்சினை வேலையாட்கள் விலகிச் செல்வது ஆகும். இதைச் சமாளிப்பதற்கு சிறு தொழிலில் ஈடுபட்டுள்ள நிறுவனங்கள் தங்களது ஊழியர்களுக்கு கொடுக்கும் சம்பளத்தையும் வசதிகளையும் சந்தையை ஒட்டி கொடுக்க வேண்டும்.

மேலும் ஊழியர்களை கையாளும் முறை மிகவும் நன்றாக இருக்க வேண்டும். அது தவிர அவர்களின் வேலைத் திறமைக்கு ஏற்ப ரிவார்டுகளையும் ஏற்படுத்தி வைக்க வேண்டும். இந்த ரிவார்டு என்பது ஒவ்வொரு வகைத் தொழிலிற்கும் மாறுபடும். அத்துறையில் உள்ள பெஞ்ச்மார்க்கைப் (benchmark) பொறுத்து நீங்கள் ஊழியர்களுக்கு கொடுக்கும் சலுகைகளை (benefits) அமைத்துக்கொள்ளுங்கள். இவை தவிர பெரிய நிறுவனங்களைப் போல மருத்துவக் காப்பீடு, ஆயுள் காப்பீடு, பி.எஃப் போன்றவற்றையும் ஏற்படுத்திக் கொடுங்கள்.

இவற்றையெல்லாம் கொடுத்து விட்டு எனக்கு என்ன மிஞ்சும் என்று நீங்கள் கேட்கலாம். இவற்றை நான் தொழில் தொடங்கிய முதல் நாளே உங்களை கொடுக்கச் சொல்லவில்லை. தொழில் வளர வளர, உங்கள் வருமானம் உயர உயர, நீங்கள் உங்கள் ஊழியர்களுக்கு வழங்கும் சலுகைகளையும் அதிகரிப்பது நல்லது. இவை தவிர நீண்ட நாள் உங்களிடம் இருக்கும் ஊழியர்களின் குழந்தையின் கல்விச் செலவு போன்றவற்றிற்கும் நீங்கள் கொடுத்து உதவலாம். இதுபோல் பார்த்து பார்த்துச் செய்ய, சிறிய நிறுவனங்களால் மட்டுமே முடியும்.

நீங்கள் உங்களால் முடிந்த சலுகைகளை ஏற்படுத்திக் கொடுத்தும், உங்களை விட்டு விலகிச் செல்லும் ஊழியர்களை நீங்கள் தடுக்க முடியாது. ஆகவே விலகிச் செல்பவர்களைப் பார்த்து கவலை கொள்ளாதீர்கள். இந்தியாவில் வேலை செய்ய ஆட்களுக்குப் பஞ்சமில்லை. நீங்கள் நபர்களை பொறுக்கி எடுத்து பயிற்சி தர வேண்டி இருக்கும். அடிக்கடி வேலையை விட்டுச் செல்லும் ஊழியர்களை சமாளிப்பதற்கு, 10 – 30% அதிக ஊழியர்களை பணியில் வைத்துக் கொள்ளுங்கள்.

அதுபோல் விடுமுறை தினங்களையும், பெரிய நிறுவனங்களைப்போல் வருடத்தின் முதல் தேதியிலேயே அறிவித்து விடுங்கள். பண்டிகை மற்றும் அரசாங்க விடுமுறைகள் வருடத்திற்கு எப்படியும் 10 நாட்களாவது வந்து விடும். அதுபோல் ஊழியர்கள் தற்காலிக விடுப்பு எடுப்பதற்கு வருடத்திற்கு ஒரு 15 நாட்களாவது நீங்கள் கொடுக்குமாறு இருக்கும். பிறகு வார விடுமுறை இருக்கவே இருக்கிறது. உங்களின் நிறுவனத்திற்கென்று வேலை செய்யும் நேரத்தையும் அறிவித்து விடுங்கள். இவ்வாறு செய்யும் பொழுதுதான், உங்களுக்கும் ஓய்வு கிடைக்கும், நிறுவனத்தில் வேலைசெய்யும் அனைவருக்கும் ஒரு தெளிவு கிடைக்கும்.

நீங்கள் சிறிய நிறுவனம் என்பதால் ஊழியர்களும் உங்களிடம் சமமாக பழகுவார்கள். அப்பொழுது அவர்களின் தேவைகள் மற்றும் கஷ்ட நஷ்டங்கள் எல்லாம் உங்களுக்குப் புரிய வரும். அவற்றைப் பொறுத்து ஒவ்வொரு ஊழியர்களின் தேவையும் உங்களுக்குத் தெரிய வரும். இது, சம்பள அட்வான்ஸ் கொடுப்பதில் ஆகட்டும், அல்லது வேலை செய்யும் நேரத்தைச் சற்று மாற்றிக்கொடுப்பதில் ஆகட்டும், அல்லது அவர்களுக்கு உரிய பயிற்சி கொடுப்பதில் ஆகட்டும், நீங்கள் அவர்களுக்கு சிறப்பாகச் செய்து கொடுக்கலாம்.

சிலர் உங்கள் நிறுவனத்தை விட்டுச் சென்றாலும் நாம் மேற்கூறியபடி ஒவ்வொரு ஊழியர்களின் வேலைத் திறமையை அறிந்து, அவர்களின் தேவையை பூர்த்தி செய்யும்பொழுது அவர்கள் உங்களிடம் நீண்ட காலத்திற்கு இருக்கவே விருப்பப்படுவார்கள். சுருக்கமாகச் சொன்னால் உங்களது பெரிய குடும்பத்தின் உறுப்பினர்களைப் போல அவர்களை நடத்துங்கள். வெற்றி உங்கள் இருவருக்குமே கிட்டும்!

-தி இந்து

தருண்

Posts : 1292
Join date : 08/10/2013

View user profile

Back to top Go down

Re: மார்க்கெட்டிங் மிக அவசியம்

Post by Sponsored content


Sponsored content


Back to top Go down

View previous topic View next topic Back to top


 
Permissions in this forum:
You cannot reply to topics in this forum